Hugsmiðjan nær samningi um baráttu gegn spillingu í Evrópu

Hugsmiðjan hefur náð spennandi samningi við evrópsk samtök á heilbrigðissviði gegn svikum og spillingu í Evrópu (European Healthcare Fraud & Corruption Network), en samtökin eru með skrifstofu í Brussel.

Aðildarstofnanir og félög EHFCN eru um 30 talsins í 16 löndum og tengjast heilbrigðisþjónustu á svæðum þar sem búa yfir 350 milljón manns.

Í tilkynningu um málið segir að Tryggingastofnun ríkisins er aðili að þessum samtökum. Hugsmiðjan mun sjá um ráðgjöf, hönnun og forritun á nýjum vef samtakanna sem byggður verður á vefumsjónarkerfinu Eplica sem er alíslensk hönnun.

Nýr vefur mun geyma upplýsingar um samtökin ásamt því að vera aðgangsstýrður samráðsvettvangur fyrir fagaðila í Evrópu sem vinna gegn tryggasvikum og spillingu á heilbrigðissviði.

Að sögn Ragnars Marteinssonar framkvæmdastjóra Hugsmiðjunnar felst mikil viðurkenning í þessum samningi á því að íslenskt hugvit standist fyllilega samanburð við það besta í Evrópu. „Það er góð tilfinning að taka þátt í útflutningi á íslensku hugviti og þetta er bara byrjunin hjá Hugsmiðjunni," segir Ragnar.