Of mikið gert úr mikilvægi gjaldeyrisvarasjóðs

Gjaldeyrisvarasjóður sem vitað er að má ekki eyða hefur engan tilgang. Þetta segir Jón Daníelsson, hagfræðiprófessor. Hann tekur undir sjónarmið Jóns Steinssonar hagfræðings sem segir of mikið gert úr mikilvægi þess að byggður sé upp stór íslenskur gjaldeyrisvarasjóður við núverandi aðstæður.

Þórlindur Kjartansson, formaður SÚS, segir í pistli á Deiglunni að yfirlýst þörf stjórnvalda fyrir lánafyrirgreiðslu frá Alþjóðagjaldeyrissjóðnum, Norðurlöndunum og fleiri ríkjum hafi stýrt öllum umræðum um Icesave samningana. Þórlindur segir að í þessu samhengi sé nauðsynlegt að ræða til hvers eigi að nota hin erlendu lán. Ítrekað hafi verið tekið fram af hálfu ríkisstjórnarinnar að ekki stæði til að nota gjaldeyrisvarasjóðinn til að verja gengi krónunnar.

Þórlindur spyr til hvers að taka lánið ef ekki á undir neinum kringumstæðum að nota varasjóðinn. Ennfremur hversu mikil vörn felist í því að vera með varasjóð til reiðu en lýsa því jafnframt yfir að ekki eigi að nota hann.

Jón Steinsson, lektor í hagfræði við Columbia háskóla í New York, tekur undir þetta í samtali við eyjuna. Hann segir að alltof mikið sé gert úr mikilvægi þess við núverandi aðstæður að byggður sé upp stór íslenskur gjaldeyrisvarasjóður með lánum frá AGS og erlendum ríkjum.