Lið Mourinho hafa ekki tapað í 150 heimaleikjum í röð

Jose Mourinho, þjálfari Inter, náði hreint út sagt ótrúlegum áfanga um helgina. Hann setti þá nýtt met sem verður líklega aldrei slegið.

Félög undir stjórn Mourinho hafa ekki tapað deildarleik á heimavelli í 150 leikjum í röð. Síðasta deildartap liða Mourinho kom fyrir tæpum átta árum síðan eða þann 23. febrúar árið 2002.

Þá tapaði Porto, 2-3, fyrir Beira Mar. Hann stýrði síðan Chelsea án þess að tapa deildarleik heima og sama hefur gerst hjá Inter.

Mourinho var samt ekkert ánægður með metið því Inter gerði aðeins jafntefli við Roma á heimavelli um helgina.

„Þessi árangur er nákvæmlega engin huggun. Ég vissi af þessu meti sem ég var reyndar löngu búinn að setja. 150 eða 151 skiptir mig engu máli," sagði Mourinho hundfúll eftir leikinn.