Tiger í rusli: Hangir heima og horfir á teiknimyndir

Tiger Woods er sagður algerlega niðurbrotinn og í einangrun á einu heimila sinna þar sem hann gerir lítið annað en að borða morgunkorn og horfa á teiknimyndir.

Eins og frægt er orðið hélt Tiger framhjá eiginkonu sinni, Elin Nordegren, með fjölda kvenna. Um tólf hafa nú stigið fram í sviðsljósið og fullyrt að þær hafi átt í sambandi við Woods.

Fram kemur í enska götublaðinu The Sun að Woods hafi skipt um farsímanúmer daginn eftir áreksturinn fræga fyrir utan heimili þeirra hjóna í Flórída. Þar með hafa vinir hans ekki náð sambandi við hann.

„Vinir hans hafa miklar áhyggjur af því að Tiger sé að takast á við þetta á mjög óheilbrigðan máta," segir heimildamaður blaðsins.

„Ég hef verið að reyna að ná í hann og get það ekki. Það er afar pirrandi," er haft eftir körfuboltastjörnunni Charles Barkley, vini Tigers. „Við viljum segja honum að okkur þykir vænt um hann og hann ætti að hringja í okkur ef hann þarfnast einhvers."

Eins og áður hefur verið greint frá mun Elin hafa sagt vinum sínum að hún ætli að sækja um skilnað við Tiger strax eftir jól. Ekki er talið ólíklegt að hún muni flytja til Svíþjóðar með tvö ung börn þeirra í kjölfarið.