Handritin á heimslista Unesco

Menningarmálastofnun Sameinuðu þjóðanna, UNESCO, hefur frá 1997 haldið skrá yfir minjar sem þykja hafa sérstakt varðveislugildi fyrir andlegan menningararf mannkyns og nefnist „Memory of the World", eða „Minni heimsins". Nú eru 193 minjar í skránni. Handritasafn Árna Magnússonar er fyrstu íslensku minjarnar til að komast í varðveisluskrána.

Handritasafn Árna Magnússonar geymir um þrjú þúsund handrit frá miðöldum og síðari öldum. Það er varðveitt hjá Stofnun Árna Magnússonar í íslenskum fræðum í Reykjavík og í Árnasafni í Kaupmannahöfn.

Meðal verka sem bætt var í varðveisluskrá UNESCO á föstudag voru dagbækur Önnu Frank og enski lagabálkurinn Magna Carta.