Lánabók Kaupþings til rannsóknar hjá skattstjóra

Ríkisskattsstjóri segir ólíklegt að skattayfirvöld hér á landi hefðu fengið sambærilegar upplýsingar við rannsókn mála eins og komu fram í lánayfirliti Kaupþings sem lekið var á netið. Ítarleg rannsókn standi yfir og ný framkomin gögn verði tekin til rannsóknar.

Lánayfirlitið var sýnt stjórn gamla Kaupþings þann 25. september, eða sama dag og bankinn ákvað að fella niður persónulegar ábyrgðir starfsmanna bankans vegna lána til hlutabréfakaupa sem námu tæpum tíu og hálfum milljarði króna.

Í lánayfirlitinu er greint frá öllum lánum Kaupþings útibúanna til viðskiptavina sinna meðal annars í Lúxemborg en þar ríkir mikil bankaleynd og upplýsingar um slíkt fást ekki auðveldlega. Í því kemur fram að stærstu lántakendur Kaupþings í Lúxemborg fengu alls um 314 milljarða króna að láni.

Skúli Eggert Þórðarson ríkisskattstjóri segir ljóst að upplýsingarnar upp úr lánayfirlitinu muni nýtast við ítarlega rannsókn embættisins á um fjögur hundruð aflandsfélögum í eigu Íslendinga sem tengjast Lúxemborg. Hann telur ólíklegt að sambærilegar upplýsingar fengjust með hefðbundnum leiðum. Hægt hafi gengið að fá upplýsingar í hendur en ný gögn verði einnig notuð við rannsókn málsins.