Efnahagsástandið mun versna áður en það batnar

Það versnar áður en það batnar. Íslendingar fá nú fyrst fyrir alvöru að finna fyrir efnahagskreppunni, hefur danska blaðið borsen.dk eftir Steingrími J. Sigfússyni fjármálaráðherra. „Það bíður okkur erfiður vetur, þar sem atvinnuleysið getur aukist á ný, en eftir það ættum við að hafa séð það versta," segir Steingrímur.

Borsen segir að ef gengið sé um götur Reykjavíkur sé ekki hægt að átta sig á því að um sé að ræða land þar sem efnahagslífið hafi hrunið. Lífið hafi sinn gang. „Hlutirnir virka, bærinn er fullur af fólki. Kannski höfum við ekki enn séð að fullu afleiðingar kreppunnar. Margir eru hræddir um komandi tíð, því þeim mun lengur sem niðursveiflan varir, þeim mun verri verður hún. En Íslendingar bjarga sér og aðlagast nýjum aðstæðum," segir Steingrímur í samtali við börsen.dk. Steingrímur segist svo trúa því að Íslendingar muni byrja að sjá eitthvað til sólar um mitt næsta ár.

Þá segir Steingrímur að fátt sé svo með öllu illt að ekki boðið nokkuð gott, því að vegna falls krónunnar sé íslensk framleiðsla orðin mun samkeppnishæfari á alþjóðamörkuðum. Þá hafi ferðamannaiðnaðurinn blómstrað á Íslandi í sumar líkt og aldrei fyrr.

Þá segir Steingrímur að Icesave málið sé mjög óvinsælt á Íslandi. „Venjulegt fólk á erfitt með að skilja að ríkið þurfi að taka ábyrgð á þessu. En við veruðm að leysa málið. Við verðum að horfast í augu við það," segir Steingrímur.