Arsenal í viðræðum um kaup á Arshavin

Zenit frá Pétursborg hefur opinberað að félagið eigi í viðræðum við Arsenal um kaup enska liðsins á Andrei Arshavin. Stjórnarmaður hjá Zenit sagði við Sky að hann vonaðist til að samningar næðust á næstu tveimur vikum.

Arshavin sló í gegn á Evrópumóti landsliða síðasta sumar og hefur verið orðaður við mörg stórlið í Evrópu. Talið er að Zenit vilji fá 20 milljónir punda fyrir Arshavin.

Arsene Wenger, stjóri Arsenal, hyggst styrkja lið sitt eftir að hafa misst fyrirliðann Cesc Fabregas á meiðslalistann. Fari Arshavin til Arsenal getur hann ekki leikið með félaginu í Meistaradeildinni þar sem hann lék með Zenit í riðlakeppninni.