Birmingham að styrkja sig

Birmingham ætlar sér stóra hluti á leikmannamarkaðnum nú í janúar. Liðið er í þriðja sæti ensku 1. deildarinnar með jafnmörg stig og Reading sem er í öðru sæti. Tvö efstu liðin munu komast beint upp í úrvalsdeildina.

Þangað stefnir Birmingham og hefur fengið kant- og sóknarmanninn Scott Sinclair lánaðan frá Chelsea. Fleiri lið voru á eftir leikmanninum en hann ákvað að velja Birmingham.

Þá hefur Glasgow Rangers staðfest að Birmingham hefur komið með tilboð í sóknarmanninn Kris Boyd. Alex McLeish, knattspyrnustjóri Birmingham, þekkir hinn 25 ára gamla Boyd vel.

Alsírski vængmaðurinn Hameur Bouazza er einnig á óskalista Birmingham. Bouazza er 23 ára og er nú í herbúðum Charlton á lánssamningi frá Fulham.