Íslandsbanki fékk undanþágu vegna sérstakra aðstæðna

Fjármálaeftirlitið veitti Íslandsbanka sérstaka undanþágu fyrir veðköllunum á 42% hlut í Icelandair Group vegna sérstakra aðstæðna að því er segir á vefsíðu FME.

"Fjármálaeftirlitið (FME) hefur verið með til athugunar skipan mála í eignarhaldi Icelandair Group hf., með hliðsjón af yfirtökureglum laga um verðbréfaviðskipti," segir á vefsíðunni.

„Athugunin leiddi í ljós að Íslandsbanki hf. hefði óbein yfirráð í Icelandair Group hf., vegna stöðu sinnar sem lánardrottinn stórra hluthafa félagsins, sem ekki standa við skuldbindingar sínar samkvæmt lánasamningum, og að Íslandsbanka hf. bæri því skylda til að gera öðrum hluthöfum félagsins yfirtökutilboð.

Fjármálaeftirlitið hefur ákveðið að Íslandsbanka hf. skuli veitt skilyrt undanþága frá tilboðsskyldu vegna þeirra sérstöku aðstæðna sem bankinn er í sem kröfuhafi gagnvart stórum hluthöfum félagsins. Að mati Fjármálaeftirlitsins uppfyllir bankinn þau skilyrði sem gera verður til að veðhafa sé veitt slík undanþága."

Á móti hefur FME takmarkað atkvæðisrétt bankans við 30% virkra atkvæða.