Lífeyrissjóðir vilja taka þátt í fjármögnun Tónlistarhúss

Landsbankinn veitti þriggja og hálfs milljarðs króna lán til að tryggja áframhaldandi framkvæmdir til Tónlistarhúsið. Vextir af láninu eru næstum tuttugu prósent. Lífeyrissjóðir hafa átt í óformlegum viðræðum við Austurhöfn, eiganda tónlistar og ráðstefnuhússins í Reykjavík, um að taka þátt í fjármögnun verksins.

Nýi Landsbankinn lánaði þrjá og hálfan milljarð króna til þess að tryggja að vinna við tónlistar og ráðstefnuhúsið héldi áfram. Þetta kemur fram í samningi um yfirtöku opinberra aðila á öllu sem tengist tónlistar og ráðstefnuhúsi, hóteli og öðrum framkvæmtum við hafnarbakkann í Reykjavík. Vextirnir af láninu nema nítján komma níutíu og fimm prósentum. Tilgangur lánsins var samkvæmt samningnum að lúka uppgjöri útistandandi skulda við verktaka og kröfuhafa Portusar, sem var í eigu Gamla Landsbankans og Nýsis.

Portus ætlaði að sjá um framkvæmdir við Tónlistar- og ráðstefnuhús og fleira á hafnarbakkanum í Reykavík. Ríki og borg hafa nú tekið verkefnið yfir. Gert er ráð fyrir að opinberir aðilar greiði árlega hátt í 860 milljónir króna til verkefnisins, næstu þrjátíu og fimm árin. Búið var að ráðstafa tíu milljörðum króna þegar ríki og borg tóku verkefnið yfir í heild sinni; þar á meðal hótelreit og það sem átti að verða Reykjavik World Trade Center.

Bankarnir þrír, Nýi Landsbanki, Nýja Kaupþing og Íslandsbanki lána fjórtán komma fimm milljörðum króna. Það á að reyna að endurfjármagna það erlendis með veði í framtíðargreiðslum opinberra aðila. Gamla Landsbankanum tókst ekki að ljúka við erlent sambankalán með sams konar veðum á árunum 2006 til átta. Þetta er þó ekki það eina sem er reynt, því Austurhöfn TR, sem sér um verkefnið fyrir ríki og borg, hefur átt í óformlegum viðræðum við lífeyrissjóði um fjármögnun. Þetta kemur fram í gögnum frá Ríkisendurskoðun, sem fréttastofa hefur undir höndum. Hugmyndin er að lífeyrissjóðirnir kaupi skuldabréf sem gefin verði út. Andvirðið verði síðan notað til að greiða banka, teljist það hagkvæmt.