Viðræður en ekki samkomulag

Landsbankinn átti í viðræðum við breska fjármálaeftirlitið (FSA) um að Icesave innlánareikningar bankans í Bretlendi yrðu færðir með flýtimeðferð yfir í dótturfélag hans þar í landi. Þetta fullyrðir Halldór J. Kristjánsson, fyrrverandi bankastjóri Landsbankans og vísar í yfirlýsingar fyrrum stjórnenda bankans frá 14 október, máli sínu til stuðnings.

Í Kastljósi í kvöld voru hins vegar birt bréf frá breska fjármálaráðuneytinu og breska fjármálaeftirlitinu þar sem greint er frá því að aldrei hafi verið gert neitt samkomulag um að færa Icesave reikningana undir breska ábyrgð. Í orðsendingu sem Halldór sendi frá sér í kvöld segir hann hins vegar að Landsbankanum hafi verið boðið upp á þennan möguleika gegn 200 milljón sterlingspunda greiðslu bankans til Bretlands vegna útstreymis af Icesave reikningum og tiltekinna annarra ráðstafanna.

„Landsbankinn kom upplýsingum um þennan möguleika til fulltrúa stjórnvalda. Þar sem Landsbankinn fékk ekki fyrirgreiðslu Seðlabankans eins og óskað var þann 6. október til að greiða umræddar 200 milljónir sterlingspunda varð formlegt samkomulag um þetta efni aldrei að veruleika. Kann það að skýra svör breskra aðila við spurningum íslenskra blaðamanna," segir Halldór í orðsendingunni. Þá segir Halldór að þessum upplýsingum hafi verið komið til umsjónarmanna Kastljóss í dag en þær ekki birtar.