Vísbendingar um að gjaldeyrir skili sér ekki samkvæmt reglum

Greining Glitnis segir að vísbendingar séu um að gjaldeyrir hafi hingað til ekki skilað sér með þeim hætti sem reglur kveða á um. Veltan á millibankamarkaðinum með gjaldeyri hefur þannig verið afar lítil.

Í Morgunkorni greiningarinnar segir að heildarveltan í janúar síðastliðnum var þannig einungis tæpir 4 milljarðar kr. samanborið við 645 milljarða kr. í janúar í fyrra. Ríflega þriðjung veltunnar í janúar átti Seðlabankinn en hann hefur allt frá hruni bankanna beitt gjaldeyrisinngripum með það að markmiði að styrkja krónuna.

Greining segir að það sé ekki gott að sjá fyrir þróun krónunnar um þessar mundir. Markaðsöflin hafa að stórum hluta verið tekin úr sambandi með gjaldeyrishöftunum. Höftin kippa áhrifavöldum fjármagnsflæðis úr sambandi við gengi krónunnar og það ræðst fyrst og fremst af vöru- og þjónustuviðskiptum að viðbættum vaxtagreiðslum.

Reikna má með því að afgangur af vöru- og þjónustuviðskiptum hafi stutt við gengi krónunnar á undanförnum mánuðum og að svo verði áfram á næstunni. Nokkur töf getur hins vegar verið á því að sá afgangur skili sterkari krónu en ætla má að bankahrunið hafi haft þau áhrif að greiðslufrestir útflutningsfyrirtækja hafi lengst og greiðslufrestir innflutningsfyrirtækja styst.

Á móti styrkingaráhrifum afgangsins á vöru- og þjónustuviðskipum á gengi krónunnar vegur að vaxtagreiðslur til útlanda hafa verið umtalsverðar enda erlendar skuldir þjóðarbúsins töluverðar.