Helmingur útskrifaðra kominn með vinnu

Alls voru 193 nemendur brautskráðir frá Háskólanum í Reykjavík í morgun. Af þeim luku 37 meistaraprófi, 124 bakkalárprófi og 32 diplómaprófi. Flestir útskriftarnemanna eru úr viðskiptadeild eða 75, en 56 nemendur útskrifuðust með próf úr tækni- og verkfræðideild. Þá útskrifaðist 31 nemandi úr lagadeild og sami fjöldi frá tölvunarfræðideild. Rúm 60% þeirra sem útskrifuðust í dag eru karlar og tæp 40% eru konur.

Helmingur þeirra nemenda sem útskrifuðust í dag hafa nú þegar fengið vinnu. Þetta kemur fram í könnun sem Háskólinn í Reykjavík gerði á meðal útskriftarnemenda. Þar kemur einnig fram að 12% þeirra ætla að halda beint áfram í frekara nám.

Um 370 nýir nemendur eru að hefja nám við Háskólann í Reykjavík á vorönn. Þar af eru um 100 skráðir í nám á frumgreinabraut og um 270 í hefðbundið háskólanám, meistara-, bakkalár- og diplómanám. Í fréttatilkynningu frá HR segir að aldrei fyrr hafi viðlíka fjöldi nýnema hafið nám við Háskólann í Reykjavík á vorönn, en skólinn hafi ákveðið í haust í kjölfar bankahrunsins að opna dyr sínar fyrir eins mörgum nemum og unnt væri, án þess að þurfa að skerða þjónustustig skólans við aðra nemendur. Alls hafi skólanum borist um 600 en 370 hefji nám.