Spyr hvort ESB aðild muni sökkva sjávarútveginum

Bandaríska blaðið Chistian Science Monitor, sem gefið er út í Boston, veltir því upp í grein í vikunni hvort áhugi Íslendinga á aðild að Evrópusambandinu muni reynast banabiti íslensks sjávarútvegs. Greinin ber yfirskriftina „Will EU lifeline sink Iceland's fishing industry."

Fjallað er um málið á vefsíðu LÍÚ. Þar segir að í greininni sé rætt við ýmsa aðila um sjávarútvegs- og efnahagsmál á Íslandi. Einar K. Guðfinnsson, fráfarandi sjávarútvegsráðherra, segir óhugsandi að Ísland gangi í ESB og haldi samt fiskveiðiréttindum sínum. Það sé ekkert annað en ímyndun.

„Við börðumst fyrir fiskveiðiréttindum okkar og þau okkar sem muna þá tíma líta á þá baráttu sem framhald á sjálfstæðisbarátu okkar," segir Einar Kristinn og bætir því við að gangi rekstur sjávarútvegs illa komi það strax fram í versnandi lífskjörum þjóðarinnar.

Sigurður Sverrisson, forstöðumaður kynningarmála hjá LÍÚ, segir í sömu grein að Evrópusambandið veiti engan afslátt af sjávarútvegsstefnu sinni, engin fordæmi séu fyrir slíku. „Ég skora á fólk að koma með dæmi um slíkt,"segir hann og bendir jafnframt á að íslenskur sjávarútvegur njóti ekki opinberra styrkja, andstætt því sem gerist innan ESB.