Verðum að vinna traust Alþjóðagjaldeyrissjóðsins

Jón Daníelsson dósent í hagfræði segir að það eina sem komi í veg fyrir að krónan geti flotið séu svokölluð jöklabréf. Hann segir ákvarðanafælni hafa einkennt fyrrverandi ríkisstjórn en leysa þarf málin með jöklabréfin hið snarasta. Hann vill bjóða eigendum þeirra að kaupa ríkisskuldabréf því annars muni krónan hríðfalla þegar hún verður sett á flot.

Nafnarnir Jón Baldvin Hannibalsson og Jón Daníelsson eru gestir á Sprengisandi á Bylgjunni þar sem þeir ræða efnahagsmál. Jón Daníelsson segir einnig að ljóst sé að vaxtalækkunarferlið strandi á Alþjóðagjaldeyrissjóðnum vegna þess að þeir hafi ekki trú á yfirvöldum. Hann segir mikilvægt að yfirvöld vinni traust sjóðsins.

Jón Daníelsson sagði að fráfarandi ríkisstjórn hafi gert sér grein fyrir því hve staðan var veik mörgum mánuðum áður en bankarnir hrundu. „Þessi neyðarlög voru ekki skrifuð á einni nóttu. Þeir hefðu því átt að vera með tilbúna áætlun en það gerðist ekkert."

Jón Baldvin tók undir með nafna sínum og sagði augljóst að allar viðvörunarbjöllur hefðu verið blikkandi lengi. Hann segir að ýmislegt hefði verið hægt að gera en menn hefðu sofið á verðinum og ekki verið með neitt „plan B" eins og hann orðaði það.

„Sennilega er það rétt að í huga seðlabankastjóra var það sem hann lýsti í Kastljósinu stóra planið. Við borgum ekki, við borgum ekki, við borgum ekki. Þið vitið ekki hvað við ætlum að gera. Við ætlum ekki að borga skuldirnar og innan skamms tíma verður íslenska ríkið skuldlítið og við byrjum nýtt líf. Þetta var bara kolröng hugsun og alveg út í hróa hött, það var ekki glóra í því sem maðurinn var að segja," sagði Jón Baldvin.