Hagfræðistofnun: Íslendingar munu flýja

Ljóst er að með Icesave samningunum skerðast lífskjör vegna aukinna skulda. Þetta segir í mati Hagfræðistofnunar Háskóla Íslands. Formaður fjárlaganefndar segir að nefndin verði að meta hvort nauðsynlegt sé að ganga frá Icesave samningunum eða hvort eigi að hafna þeim.

Greinargerð hagfræðistofnunnar Háskóla Íslands á áhrifum Icesave samninganna var kynnt fyrir fjárlaganefnd í dag.

Í henni kemur fram töluverð gagnrýni á mat Seðlabankans og fjármálaráðuneytisins um greiðslubyrði Icesave samninganna.

Í skýrslu hagfræðistofnunnar segir meðal annars að í álitum seðlabanka og fjármálaráðuneytis sé ekki tekið tillit til þess að aukin skuldabyrði muni hafa neikvæð áhrif á hagvöxt sem leiði til verri lífskjara. Ljóst sé að lífskjör skerðist vegna aukinna skulda.

Þá segir að mesta hættan liggi í því ef þær efnahagshremmingar sem Ísland glími nú við verði til þess að fólk flytji úr landi í stórum stíl. Slíkt myndi þyngja skuldabyrðina hjá þeim sem eftir sitja.

Guðbjartur Hannesson gerir ekki ráð fyrir að málið tefjist og gerir ráð fyrir að fjárlaganefnd afgreiði Icesave málið úr nefnd næstu helgi.