Úr Íslandsmeti í hagnaði yfir í gjaldþrot innan árs

Fons, eignarhaldsfélag Pálma Haraldssonar og Jóhannesar Kristinssonar, fór úr því að eiga Íslandsmet í hagnaði yfir í gjaldþrot á innan við ári.

Í ágúst í fyrra hagnaðist Fons um 75 milljarða kr. á því að selja hlut sinn í verslunarkeðjunni Iceland í Bretlandi. Í dag eru fréttir um að skuldir þrotabús Fons nemi 20 milljörðum kr.

„Þetta er sennilega Íslandsmet í hagnaði," sagði Pálmi Haraldsson í samtali við Fréttablaðið þann 16. ágúst í fyrra þegar greint var frá sölunni á hlutnum í Iceland og raunar fleiri fyrirtækjum í Bretlandi sem Fons átti hlut í.

Í frétt á visir.is frá þessum tíma segir að Fons..."hafi selt hluti sína í Iceland, Landic Property, Booker, Goldsmith fyrir um 100 milljarða. Heimildir Vísis herma að hagnaður Fons af sölunni á hlutnum í Iceland sé um 75 milljarðar króna og yfir 80 milljarðar af heildarsölunni .

Heimildir Vísis herma að hópur fjárfesta, þar á meðal Stoðir, áður FL Group, hafi keypt hlut Fons í Iceland og hinum félögunum og að þau kaup séu fjármögnuð með hjálp frá Landsbankanum, Glitni og Kaupþingi.

Söluhagnaður Fons á hlut sínum í Iceland-keðjunni er fimmtán milljörðum meiri en hjá Björgólfi Thor Björgólfssyni þegar hann seldi búlgarska fjarskiptafyrirtækið BTC í fyrir rúmu ári. Sú sala hefur hingað til verið talin sú arðbærasta hjá íslenskum fjárfesti."

Þess ber að geta að á milli Íslandsmetsins í hagnaði og gjaldþrots Fons hrundi bankakerfi og efnahagslíf Íslands.