Hinir ábyrgu sýna almenningi löngutöng

Það þarf að teikna upp nýtt hagkerfi, með nýjum leikstjórnendum og nýjum leikreglum, sagði Gylfi Magnússon, dósent í viðskiptafræði, í ræðu sinni á fundi Radda fólksins á Austurvelli í gær.

Gylfi sagði að flestir Íslendingar vildu sterkan opinberan geir og sterkan einkageira. Einkageiran þyrfti hins vegar að losa við meinsemdir útrásarvíkinga, með öll sín eignarhaldsfélög, „Group", bókhaldsbrellur, vogaðar stöður, skattaskjól, eigna‐ og stjórnunartengsl og pólitísk tengsl.

„Þetta er hluti af því sem fara þarf á öskuhauga sögunnar. Ekkert af þessu skapaði nein raunveruleg verðmæti. Í stað þess getur komið blómlegt atvinnulíf með fleiri og smærri fyrirtækjum, dreifðara en einfaldara eignarhaldi, meiri valddreifingu, meira gagnsæi, hraustlegri samkeppni, meiri nýsköpun, fleiri tækifærum fyrir alla. Opið, sanngjarnt og heilbrigt efnahagslíf. Það þarf mörgu að breyta. Fyrst hugarfarinu. Sú hugmyndafræði sem kom okkur í núverandi stöðu er andlega gjaldþrota. Þeir sem fóru fyrir henni þurfa að víkja strax af sviðinu og láta öðrum eftir uppbygginguna. Hvort sem þeir eru í stjórnmálum, stjórnkerfinu, fyrirtækjarekstri, fara fyrir hagsmunasamtökum eða voru bara í klappliðinu," sagði Gylfi.

Hann sagði að fyrsta skrefið til fyrirgefningar væri að þetta fólk rétti fram sáttarhönd og axlaði ábyrgð með því að víkja. „Því miður hefur lítið sést til þeirrar sáttahandar enn þá. Það glittir bara í löngutöng," bætti Gylfi við.

Gylfi birtir ræðuna á vefsíðu sinni og með því að smella á hlekkinn hér að neðan er hægt að lesa hana í heild.