Berserksgangur í Kaupþingi litinn alvarlegum augum

„Öll svona atvik eru litin alvarlegum augum og farið yfir öll ferli og kannað hvernig eigi að meðhöndla áframhaldið," segir Berghildur Erla Bernharðsdóttir, upplýsingafulltrúi Kaupþings.

Karlmaður, vopnaður exi, fór í síðustu viku að útibúi Kaupþings í Mjóddinni og braut rúður í húsi útibúsins. Að sögn Berghildar var þetta eftir lokun og maðurinn komst því ekki inn til þess að ógna starfsfólki.

Berghildur segir erfitt að tjá sig um það hvort einhverjar breytingar verði gerðar á öryggismálum vegna þessa atviks. Öryggismál séu einfaldlega þess eðlis að það sé erfitt að tjá sig um þau opinberlega.