SpKef, Byr og SPRON vilja sameinast

Stjórnir Sparisjóðsins í Keflavík, Byrs sparisjóðs og SPRON hafa undirritað viljayfirlýsingu þess efnis að hefja undirbúning og vinnu sem miðar að því að sameina sparisjóðina. Sparisjóðirnir hafa skuldbundið sig til að ræða ekki við aðra aðila um samstarf eða sameiningu á meðan að viðræður standa yfir. Stefnt er að því að niðurstaða liggi fyrir eins fljótt og hægt er.

Í viljayfirlýsingunni kemur fram að unnið verður eftir aðgerðaráætlun og er stefnt að því að stofnfjáreigendur og hluthafar verði boðaðir til fundar í

febrúarmánuði til þess að fjalla um tillögu að samruna sem mun miðast við 1. janúar 2009.

„Sparisjóðurinn er jákvæður fyrir sameiningarviðræðunum. Þessir þrír sparisjóðir eiga hvað mesta samleið og gangi sameiningin eftir verður til sterk eining í sparisjóðafjölskyldunni öllum sparisjóðum til hagsbóta. Á þessum erfiðu tímum sem framundan eru, þá mun sameinaður sterkur sparisjóður mynda tryggan rekstrargrundvöll og skapa traust viðskiptavina og annarra hagsmunaaðila," segir Geirmundur Kristinsson, sparisjóðsstjóri Sparisjóðsins í Keflavík, í tilkynningu sem send var út vegna málsins. Hann segir jafnframt að sameinaður sparisjóður muni áfram þjónusta sitt starfssvæði á öflugan hátt og í góðum tengslum við samfélagið. Sameining sjóðanna muni leggja grunninn að framtíð sparisjóða á Íslandi.

Ragnar Z. Guðjónsson, sparisjóðsstjóri Byrs sparisjóðs, segir að stjórn Byrs hafi ákveðið að fara í þessar viðræður þrátt fyrir sterka stöðu Byrs með hagsmuni viðskiptavina og annara hagsmunaaðila að leiðarljósi. „Með viðræðunum erum við að kanna hvort grundvöllur sé fyrir sameiningu fyrirtækjanna. Náist niðurstaða sem er öllum aðilum að skapi, er lagður grunnur að sterku fyrirtæki sem er vel í stakk búið að takast á við framtíðina," segir Ragnar. Hann segir að sameinaður sparisjóður eigi einnig mikil sóknarfæri þegar markaðir komist aftur í eðlilegt horf. Það sé því áhugavert fyrir Byr að skoða þennan möguleika ofan í kjölinn. Þessi kostur verði því kannaður til hlítar eins hratt og auðið verður.



Guðmundur Hauksson, forstjóri SPRON segir að markmið sameiningarinnar sé að styrkja sparisjóðina í því erfiða efnahagsumhverfi sem framundan sé og stuðla að aukinni hagræðingu í íslensku fjármálakerfi. Með samrunanum verði til stærri og öflugri eining, sem sé vel í stakk búin að til takast á við ný og krefjandi framtíðarverkefni. Sparisjóðirnir hafi allir þrír lagt ríka áherslu á persónulega og góða þjónustu til viðskiptavina sinna og með stærri og öflugri einingu verði hægt að efla þjónustu þeirra enn frekar.