Gallas ekki á förum frá Arsenal

Umboðsmaður varnarmannsins William Gallas hefur útilokað það að leikmaðurinn gangi til liðs við Paris Saint Germain í janúar eins og orðrómur hefur verið í gangi um.

Gallas mun leika með Arsenal gegn Dynamo Kiev í Meistaradeildinni í kvöld en hefur misst fyrirliðabandið eftir ummæli sín við fjölmiðla.

Gallas hefur lýst yfir áhuga sínum á að enda ferilinn í heimalandi sínu. Etienne Mendy, umboðsmaður hans, segir þó að Gallas sé ekkert á förum og segir enska fjölmiðla vera að skálda upp fréttir.

„Síðan hann brást illa við eftir leik gegn Birmingham á síðasta tímabili hafa enskir fjölmiðlar verið að ímynda sér að hann sé á förum frá Arsenal. Það er bara lygi. Hann er aldrei betri en þegar hann hefur bakið upp við vegg," sagði Mendy.