Ólafur mun semja við Rhein-Neckar Löwen

Ólafur Stefánsson mun semja við þýska úrvalsdeildarfélagið Rhein-Neckar Löwen til tveggja ára og fara til félagsins í sumar.

Þetta herma heimildir fréttastofu Stöðvar 2 en ljóst er að ekkert verður af því að hann fari til danska C-deildarliðsins AG Håndbold.

Ólafur var búinn að semja við AG en í gær var greint frá því að Jesper Nielsen, eigandi KasiGroup - aðalstyrktaraðila félagsins, væri hættur við áætlanir sínar um að gera AG að sterkasta handboltafélagi Danmerkur.

Þess í stað hefur hann tekið við starfi hjá Rhein-Neckar Löwen en KasiGroup hefur einnig verið aðalstyrktaraðili þess félags.

Ólafur mun því fylgja Nielsen til Rhein-Neckar Löwen þar sem hann hittir fyrir Guðjón Val Sigurðsson.

Ólafur er þó ekki enn búinn að skrifa undir samninginn en það mun vera formsatriði að ganga frá því.