Mættir til Japans til að vinna

Wayne Rooney, sóknarmaður Manchester United, segir að liðið sé ekki mætt til Japans í frí. Hann segir að menn séu ákveðnir í að landa sigri á heimsmeistaramóti félagsliða.

United mætir Gamba Osaka frá Japan í undanúrslitum á fimmtudag. Barcelona og Liverpool hafa bæði misstigið sig í úrslitaleik þessa móts. „Við förum í allar keppnir með því markmiði að vinna. Það væri frábært að geta snúið aftur heim sem heimsmeistarar. Það yrði mikil viðurkenning fyrir leikmenn og félagið," sagði Rooney.

„Við erum ekki mættir hingað haldandi það að við vinnum þetta létt. Menn þurfa að leggja sig fram. Það hlýtur að vera okkur hvatning að við eigum möguleika á að vinna titil sem ekkert enskt félag hefur unnið."