Evra stefnir á þriðja bikarinn í röð

Patrice Evra hefur sett sér það markmið að vinna ensku úrvalsdeildina þriðja árið í röð með Manchester United. Rauðu djöflarnir kveðja árið 2008 sem Englandsmeistarar, Evrópumeistarar og heimsmeistarar félagsliða.

„Ég hef sett mér það markmið að vinna þriðja Englandsmeistaratitilinn í röð. Það yrði frábær tilfinning. Við erum með gæðin til að ná þess en verðum að leggja hart að okkur," sagði bakvörðurinn franski.

Evra getur ekki hjálpað United í næstu fjórum leikjum þar sem hann mun taka út leikbann fyrir uppákomuna frægu á Stamford Bridge á síðasta tímabili. „Ég vil þakka enska knattspyrnusambandinu fyrir að gefa mér frí, nú get ég verið með fjölskyldunni yfir jólin," sagði Evra með kaldhæðnistón.

„Ég hef hugsað út í þetta leikbann hvern einasta dag síðan ég var dæmdur í það. Ég er auðvitað mjög reiður því að ég gerði ekki það sem ég er ásakaður um. Það er skiljanlegt að missa af leikjum vegna meiðsla en það er erfitt að sætta sig við að missa af fjórum leikjum út af svona. Þetta var ekki jólagjöfin sem ég óskaði eftir."