City reyndi að fá Diarra

Lassana Diarra segir að Manchester City hafi sett sig í samband skömmu áður en hann samdi að ganga í raðir Real Madrid frá Portsmouth á dögunum.

Miðjumaðurinn öflugi stóðst læknisskoðun hjá Real í gær og hefur nú gengið formlega í raðir spænska stórliðsins. Sagt er að Real hafi borgað allt að 20 milljónir punda fyrir hann.

Mark Hughes stjóri Manchester City hafði látið í það skína að Diarra væri á óskalista félagsins og nú hefur Diarra staðfest það.

"Vildi City fá mig? Svo sannarlega. Ég hefði fengið meira borgað þar. Mér þykir vænt um ensku úrvalsdeildina en það var svo freistandi að fara til Real Madrid," sagði Diarra í samtali við L´Equipe í Frakklandi.

Hann talaði líka um það hvað hann væri upp með sér yfir því að hafa verið í sigtinu hjá spænska stórliðinu.

"Ég var á Englandi í fimm ár og lærði mikið. En svo kom Real og það var forgangsatriði hjá félaginu á ná í mig. Það er mikill heiður. Portsmouth er í vandræðum og þarf að selja leikmenn," sagði Diarra.