Leikmaður kærður vegna umdeildra fagnaðarláta

Enska knattspyrnusambandið hefur ákveðið að kæra David Norris, leikmann Ipswich, fyrir ósæmilega hegðun í tengslum við fagnaðarlæti hans er hann skoraði í leik með félaginu fyrr í mánuðinum.

Svo virtist sem að Norris hafi fagnað markinu með því að láta eins og að hann væri í handjárnum, til stuðnings við fyrrum liðsfélaga sinn, markvörðinn Luke McCormick. Sá síðarnefndi var dæmdur í sjö ára fangelsi fyrir að verða valdur að dauða tveggja ungra drengja með ölvunarakstri. McCormick lék áður með Plymouth.

Ipswich hefur þegar sektað Norris vegna málsins og hann hefur beðist afsökunar á atvikinu. Hann neitaði því hins vegar að hafa látið eins og hann hafi verið í handjárnum. Enska knattspyrnusambandið er hins vegar ekki ánægt með að Norris hafi ákveðið að tjá sig um jafn viðkvæmt mál á opinberum vettvangi og telur það óviðeigandi.