TM hefur fengið starfsleyfi í Færeyjum

Tryggingamiðstöðinni hf. (TM) hefur, fyrst erlendra tryggingafélaga, verið veitt starfsleyfi í Færeyjum. TM mun fyrst um sinn einbeita sér að sjótryggingum, enda fiskveiðar stór hluti færeysks atvinnulífs og TM afar reynslumikið félag á því sviði.

Í tilkyningu um málið segir að starfsemi því tengd sé þegar hafin í Færeyjum. Síðar meir er ætlunin að bjóða allar almennar skaðatryggingar fyrir fyrirtæki og einstaklinga.

Á færeyskum tryggingamarkaði í dag eru tvö félög, P/F Tryggingarfelagid Føroyar og P/F Trygd, og ætti TM því að vera kærkomin viðbót fyrir samkeppnisumhverfið í Færeyjum.

"Það er mikill heiður fyrir Tryggingamiðstöðina að verða fyrst erlendra tryggingafélaga til að fá starfsleyfi í Færeyjum," segir Sigurður Viðarsson, forstjóri TM.

„Við lítum á Færeyjar sem hluta af okkar heimamarkaði, enda atvinnulífið og samfélagið allt líkt því sem gerist hér á landi. Sjávarútvegur er ráðandi atvinnuvegur í Færeyjum og þar sem TM hefur ávallt verið afar sterkt félag á því sviði teljum við að innkoma okkar á færeyska markaðinn muni verða öllum til hagsbóta."