Robbie Fowler til Grimsby?

John Fenty, stjórnarformaður Grimsby, segir að félagið hafi átt í viðræðum við Robbie Fowler. Grimsby er í botnbaráttu ensku 3. deildarinnar (D-deildar) og vill fá Fowler sem leikmann og einnig í þjálfaraliðið.

Fowler er 33 ára og er sem stendur á þriggja mánaða samningi. „Það er möguleiki á því að hann fái framlengingu á samningi sínum hjá Blackburn," segir Fenty.

„Ef það gerist hinsvegar ekki þá er möguleiki á því að hann komi til Grimsby," sagði Fenty en Fowler er góður vinur Mike Newell sem er knattspyrnustjóri Grimsby.

Fowler er fjórði markahæsti leikmaður í sögu ensku úrvalsdeildarinnar með 161 mark. Hann er goðsögn í augum stuðningsmanna Liverpool en á síðustu leiktíð lék hann með Cardiff City í 1. deildinni.