Markalaust hjá Liverpool og West Ham

Liverpool er með eins stigs forystu á toppi ensku úrvalsdeildarinnar eftir markalaust jafntefli gegn West Ham í kvöld. Úrslitin eru þó klárlega vonbrigði fyrir Liverpool sem var mun sterkara liðið í kvöld.

West Ham fékk þó sín færi og til að mynda þá átti Craig Bellamy skot í stöngina í fyrri hálfleik. Leikurinn var í beinni textalýsingu hér á Vísi og má lesa hana í heild sinni hér að neðan.

______________

Liverpool - West Ham 0-0

21:53 Leik lokið - Annað 0-0 jafnteflið í röð á Anfield. Ryan Babel átti stórhættulegt skot í viðbótartímanum en naumlega framhjá. Þá átti West Ham einnig hættulega sókn en niðurstaðan markalaust jafntefli.

21:49 Dirk Kuyt fékk gott færi en Robert Green varði. Hinumegin fékk Luis Boa Morte fínt færi en skotið var arfadapurt. Venjulegum leiktíma er lokið.

21:45 „Á ég að trúa því að hann hafi fengið boltann í höndina? Já hann gerði það. Ég er sannfærður um að þetta sé heimsmet," segir Guðmundur Benediktsson. Ilunga hefur fengið knöttinn það oft í höndina í leiknum að ég er hættur að hafa tölu á því.

21:42 Hyypia enn og aftur hættulegur, klárlega hættulegasti leikmaður Liverpool sóknarlega í þessum leik. Um sjö mínútur eru eftir af venjulegum leiktíma. Fáum við ekkert mark?

Brynjar Björn Gunnarsson er kominn inn sem varamaður í leik Reading og Coventry.

21:37 Reading - Coventry 3-1

Noel Hunt að skora sitt annað mark og innsigla sigur Reading. Aron Einar Gunnarsson er farinn af velli hjá Coventry en hann hafði nælt sér í gult spjald í fyrri hálfleik og var síðan skipt af velli í þeim síðari.

21:28 David Ngog kominn inn sem varamaður fyrir Robbie Keane. „Skiljanlegt. Keane ekki staðið undir væntingum í kvöld," segir Guðmundur Benediktsson sem lýsir leiknum á Stöð 2 Sport. West Ham var nálægt því að skora rétt áðan þegar Carlton Cole skallaði rétt framhjá eftir hornspyrnu.

21:16 Benayoun fékk mjög gott færi þegar boltinn barst til hans í teignum og átti Ísraelsmaðurinn gott skot. Robert Green varði hinsvegar frábærlega í markinu.

21:09 Seinni hálfleikur er farinn af stað og um 5 mínútur liðnar af honum án þess að nokkuð markvert hafi gerst á þeim tíma. Engar breytingar voru gerðar á liðunum í hálfleik.

20:48 Kominn hálfleikur á Anfield. Markalaust. Liverpool mun sterkara liðið á vellinum og Hyypia búinn að fá bestu færin. En bestu tilraunina átti Bellamy þegar hann þrumaði í stöngina.

20:43 Craig Bellamy með hörkuskot í innanverða stöngina á marki Liverpool! Þarna mátti engu muna að Bellamy kæmi West Ham yfir gegn sínum gömlu félögum algjörlega gegn gangi leiksins. Það má ekki útiloka West Ham.

Reading - Coventry 2-1

Kalifa Cisse hefur komið Reading yfir fimm mínútum eftir að Hunt jafnaði. Hörkuleikur í Coca Cola deildinni.

20:39 Reading - Coventry 1-1

Noel Hunt hefur jafnað fyrir Reading.

Liverpool er 86% með boltann. Það segir það sem segja þarf. Átta mínútur til hálfleiks.

20:29 West Ham má teljast heppið að vera ekki lent undir. Carlton Cole bjargaði á marklínu áðan eftir skalla frá Hyypia. Stefnir í langt kvöld hjá lærisveinum Gianfranco Zola ef þeir ætla að halda áfram á þessari braut.

Reading - Coventry 0-1

Daniel Fox búinn að koma Coventry yfir með marki beint úr aukaspyrnu.

20:20 Liverpool búið að fá tvö góð færi. Riera kom boltanum framhjá Green markverði en Collins kom til bjargar og hindraði að hann færi í netið. Stuttu seinna skallaði Hyypia naumlega yfir eftir hornspyrnu.

20:13 Þetta fer fremur rólega af stað og ekkert alvöru færi á fyrstu 10 mínútunum en heimamenn mun meira með boltann. Liverpool vildi fá dæmda hendi á Ilunga innan teigs en dómarinn dæmdi ekkert.

20:02 Leikurinn er farinn af stað á Anfield. Athygli vekur að George Gillett, annar af eigendum Liverpool, er á meðal gesta en hann hefur ekki mætt á völlinn síðan Liverpool vann Manchester United.

19:50 Við munum einnig fylgjast með gangi mála í Íslendingaslag Reading og Coventry í ensku 1. deildinni sem hefst einnig klukkan 20. Ívar Ingimarsson er í byrjunarliði Reading en Brynjar Björn Gunnarsson á bekknum. Aron Einar Gunnarsson er í byrjunarliði Coventry.

19:45 Byrjunarlið Liverpool: Reina, Arbeloa, Carragher, Hyypia, Dossena, Benayoun, Gerrard, Alonso, Riera, Kuyt, Keane. (Varamenn: Cavalieri, Agger, Babel, Mascherano, Leiva Lucas, Insua, Ngog)

Byrjunarlið West Ham: Green, Neill, Collins, Upson, Ilunga, Faubert, Parker, Mullins, Behrami, Bellamy, Cole. (Varamenn: Boa Morte, Noble,Lastuvka, Tristan, Davenport, Collison, Di Michele)