Kauphöll Íslands féll mest á árinu

Kauphöll Íslands er í efsta sæti lista viðskiptatímaritsins The Economist yfir þær kauphallir heims þar sem hlutabréfaverð hefur fallið mest á árinu. Samkvæmt listanum hefur verðmæti fyrirtækja á lista kauphallar Íslands minnkað um 72%.

Fallið í kauphöllinni í Ósló er 55%, 50% í Kaupmannahöfn og 43% í Stokkhólmi. Þá er fallið í stærstu kauphöllum Evrópu og Bandaríkjanna á bilinu 33-42%.

Hrunið hér á landi má að sálfsögðu rekja til falls íslensku bankanna og stendur úrvalsvísitalan nú í tæpum 350 stigum. Hæst fór hún í 9016 stig sem var í júlí í fyrra. Alls eru nú 16 félög skráð í Kauphöll landsins sem er einu minna en þegar hún var stofnuð árið 1993.