Úttekt á Samvinnutryggingum aftur til ársins 1989

Fulltrúaráðsfundur í Eignarhaldsfélaginu Samvinnutryggingar sem haldinn var í dag ákveðið að framkvæmd verði úttekt á starfsemi félagsins og dótturfélaga undanfarin nítján ár af óháðum og sérfróðum aðila.

Ákveðið var fyrir tæpu einu og hálfu ári að allar eignir og skuldir Samvinnutrygginga rynnu inn í fjárfestingarfélagið Gift. Skilanefndin vann að skipta hlutabréfinu í Gift, en það er fjórir milljarðar króna að nafnverði. Á fundinum í dag skilaði skilanefnd formlega til baka umboði sínu. Ákvörðun um það var tekin eftir að upplýsingar bárust frá stjórn Gift fjárfestingarfélags um að eigið fé félagsins væri orðið neikvætt. Skilanefndin taldi starfi sínu því sjálfhætt.

Verkefni skilanefndar Eignarhaldsfélagsins Samvinnutryggingar var að skipta einu eign félagsins, hlutafé að nafnvirði fjórir milljarðar króna, á milli fyrrum tryggingartaka þess og sjálfseignarstofnunarinnar Samvinnusjóðsins.

,,Hins vegar var það ekki verkefni skilanefndarinnar að selja eignir EST og koma þeim í verð og skipta síðan andvirði þeirra á milli eigenda, eins og oftast á við þegar ákveðið er að slíta félagi sem þessu, þar sem fulltrúaráðsfundur EST hafði ákveðið að stofna Gift og láta það starfa með sjálfstæðri stjórn samhliða skiptaferlinu, en eigendur EST myndu síðan eignast hlut í Gift," segir í tilkynningu.

Á fundinum var nýrri stjórn falið að kalla til sérfróðan og óháðan aðila með sérþekkingu á sviði félagaréttartil að fara yfir öll málefni félagsins frá árinu 1989, þ.m.t. dótturfélagsins Giftar fjárfestingarfélagsfrá stofnun þess, til dagsins í dag.

,,Að úttekt lokinni skal skýrsla samin og lögð fyrir fulltrúaráðsfund Eignarhaldsfélagsins Samvinnutrygginga, þar sem hinn sérfróði óháði úttektaraðili gerir grein fyrir niðurstöðum sínum og þeim ályktunum sem hann dregur af þeim."

Á fundi fulltrúaráðsins var kjörin ný stjórn en hana skipa Gunnlaugur Aðalbjarnason, Karl Stefánsson og Ómar Valdimarsson. Stjórnin á eftir að skipta með sér verkum.