Fiskur og ál falla í verði

Aðalútflutningsvörur okkar, fiskur og ál, hríðfalla í verði í erlendum gjaldeyri talið. Tonnið af áli hefur lækkað úr þrjú þúsund og fjögur hundruð dollurum í sumar niður í rúma sextán hundruð dollara núna.

Það er meðal annars rakið til samdráttar í iðnaði í heiminum. Tekjur orkufyrirtækjanna taka að hluta til mið af álverði á heimsmarkaði, þannig að þær hafa minnkað verulega.

Þá hafa frystar þorskafurðir lækkað um tuttugu prósent og frystar ýsuafurðir um allt að tuttugu og fimm prósent á Bretlandsmarkaði að undanförnu, en Bretlandsmarkaður er þýðingamesti markaður okkar fyrir fiskafurðir. Aðal ástæða þess er minnkandi kaupmáttur almennings í Bretlandi.