Liverpool braut af sér í báðum mörkunum

Phil Brown, stjóri Hull City, var ósáttur við bæði mörkin sem lið hans fékk á sig á Anfield í dag þegar Liverpool og Hull gerðu 2-2 jafntefli.

Brown vildi meina að leikmenn Liverpool hefðu brotið á varnarmanninum Michael Turner í aðdraganda beggja markanna.

Þegar mörkin eru skoðuð má sjá að stjórinn hefur ef til vill nokkuð til síns máls, en hann sagðist ekki eiga von á því að hafa heppnina með sér á þessum velli.

Þá mátti Liverpool líka þakka fyrir að fá ekki dæmda á sig vítaspyrnu þegar boltanum var spyrnt í höndina á Javier Mascherano inni í vítateig.

"Maður er ekki að fara að fá vafaatriði dæmd sér í hag fyrir framan Kop stúkuna, en mér fannst brotið á Michael Turner í báðum mörkunum. Það tók mikla vinnu að komast í þessa stöðu (2-0) og því var ég vonsvikinn með þessi tvö mörk. Eftir á að hyggja var kannski fínt að fá stig á stað þar sem enginn ætlaði okkur að ná í stig," sagði Brown.