Segir stýrivexti óbreytta fram í mars en lækki þá hratt

Stýrivextir verða óbreyttir í 18% fram til mars á næsta ári að mati greiningar Glitnis. Þá reiknar greiningin með því að þá hefji Seðlabankinn vaxtalækkunarferil sinn og að hann lækki vexti nokkuð hratt.

Fjallað er um málið í Morgunkorni greiningarinnar en hún hefur gefið út nýja spá um stýrivexti og gengi krónunnar.

Með sterkari krónu, vaxandi slaka á vinnumarkaði, lækkandi húsnæðisverði og hrávöruverði á niðurleið sem og annar erlendur verðbólguþrýstingur skapast forsendur fyrir því að Seðlabankinn lækki vexti sína hratt.

Spáir greiningin því að bankinn verði kominn með stýrivexti sína í 7% í lok næsta árs og að hann lækki vexti sín enn frekar á árinu 2010.

Greiningin spáir því að evran muni kosta um 120 krónur í lok næsta árs og að dollarinn verði þá kominn í 85 krónur. Reiknað er með því að stöðugleiki náist á gjaldeyrismarkaði á næstu misserum og að krónan styrkist nokkuð frá núverandi gildi.

Markmið Seðlabankans og stjórnvalda í samvinnu við Alþjóðagjaldeyrissjóðinn er að tryggja þetta og reiknar greiningin með því að beitt verði boðuðum aðgerðum í því sambandi, þ.m.t. áframhaldandi höftum á gjaldeyrismarkaði, háum stýrivöxtum og aðhaldi í aðgangi bankanna að lánum frá Seðlabankanum.

Alþjóðagjaldeyrissjóðurinn segist ekki mæla með því að íslensk stjórnvöld aflétti hömlum á gjaldeyrisviðskipti þar til stöðugleika hefur verið náð á gjaldeyrismarkaði.

þeir segja að höftin séu nauðsynleg um þessar mundir en að þeim verði aflétt samhliða því að trúverðugleiki eykst og að þau verði horfin að fullu áður en tveggja ára samstarfsverkefni sjóðsins og íslenskra stjórnvalda á sviði efnahagsmála er á enda.