Frjálsi Fjárfestingarbankinn þvingar fyrirtæki með myntkörfulán

Frjálsi Fjárfestingarbankinn þvingar fyrirtæki sem eru í viðskiptum við bankann með myntkörfulán á gjalddaga, til að skuldbreyta lánunum í íslenskar krónur. Fréttastofu er kunnugt um á annan tug byggingaverktaka sem horfa fram á gjaldþrot vegna þessa.

Flestir þeir aðilar sem fréttastofu er kunnugt um að Frjálsi fjárfestingabankinn hafi stillt upp við vegg með þessum hætti hafa enn ekki skrifað undir skuldbreytingu á lánum. Dæmi eru um að lánsupphæð hafi tvöfaldast á einu ári vegna gengis krónunnar sem bankinn miðar jú við, þegar fyrirtækin eru krafin um að breyta þeim í íslenskar krónur til að framlengja í láninu.

Verktakarnir hafa margir hverjir hundruð milljóna kröfu skráða í einkabanka sínum sem gjaldfallna skuld.

Enginn þeirra fékkst í viðtal af ótta við frekari aðgerðir af hálfu Frjálsa fjárfestingabankans.

Þeir segja þennan gjörning bankans gera það að verkum að nær öll þessi fyrirtæki eigi sér ekki viðreisnar von. Fyrirtæki sem stóðu þokkalega fyrir hrun bankanna verða einfaldlega gjaldþrota

Öll hafa þau starfmenn og undirverktaka á sínum snærum og margfeldisáhrifin eru því gríðarleg.

Verkefnaskortur og atvinnuleysi blasa við hátt á annað hundrað manns hjá fyrirtæki sem hefur tíu undirverktaka.

Byggingaverktakarnir biðla til ríkisvaldsins að koma í veg fyrir þessa aftöku á fjölda fyrirtækjum og segja einu skynsamlegu aðgerðina að bíða, í von um betra gengi krónunnar líkt og ríkisbankarnir hafi gert fyrir sína viðskiptavini meðan þessi mikili órói og óvissa er í efnahgsmálum.

Þær upplýsingar fengust hjá Frjálsa fjárfestingabankanum að þar sem ekkert erlent fjármagn sé fáanlegt komi framlenging erlendra lána ekki til greina. Lán þessara viðskiptavina bankans þurfi því gjaldfella og umreikna í íslenskar krónur.