Milestone ræðir við Glitni um endurskipulagningu félagsins

Milestone á nú í viðræðum við Glitni um fjárhagslega endurskipulagningu á félaginu. Þetta kemur fram í tilkynningu til kauphallarinnar.

Milestone segir að fall bankakerfisins á Íslandi og erfiðeikar á fjármálamörkuðum í heiminum hafa haft umtalsverð áhrif á efnahag Milestone eins og annarra fyrirtækja á Íslandi. Milestone á nú í viðræðum við stærsta lánveitanda sinn, Glitnir, um fjárhagslega endurskipulagningu á félaginu.

Milestone ehf. er útgefandi eftirfarandi markaðsbréfa sem voru á gjalddaga í október: MILE 08 1026. Vegna ofangreindra aðstæðna voru markaðsbréfin ekki greidd á gjalddaga. Unnið er að fjárhagslegri endurskipulagningu og af hálfu félagsins er að því stefnt, að niðurstaða náist innan fárra vikna í samstarfi við lánadrottna félagsins.

Í framhaldi af þessu hafa skuldabréfin verið færð á Athugunarlista vegna óvissu um framtíð útgefanda með vísan til tilkynningar frá félaginu vegna greiðsluerfiðleika félagsins.