Verðbólguvæntingar stjórnenda í hæstu hæðum

Verðbólguvæntingar stjórnenda fyrirtækja hafa rokið upp að undanförnu. Samkvæmt könnun sem gerð var í nóvember og desember fyrir Seðlabankann væntu forsvarsmenn fyrirtækja 15% verðbólgu á næstu tólf mánuðum.

Fjallað er um málið í Morgunkorni greiningar Glitnis. Þar segir að um sé að ræða verulega hækkun frá síðustu könnun sem gerð var í september en forsvarsmenn fyrirtækja væntu þá 7% verðbólgu á næstu tólf mánuðum. Frá þessu segir í Hagvísum Seðlabankans sem birtir voru í gær.

Samkvæmt sömu könnun eru stjórnendur fyrirtækja afar svartsýnir á framvindu efnahagsmála. Helmingur þeirra telja að ástandið muni versna á næstu sex mánuðum. Þar með er þó ekki sagt að þessir aðilar telji að aðstæður séu góðar núna.

Nánast allir eða 98,6% stjórnenda telja að núverandi aðstæður í efnahagsmálum séu slæmar. Fleiri sjá nú ástandið svart en áður en í september töldu 83% stjórnenda að aðstæðurnar væru slæmar.