Benitez: Við verðum að vinna svona leiki

Rafa Benitez var eðlilega ósáttur við sína menn í Liverpool í dag þegar þeir máttu sætta sig við þriðja jafnteflið í röð á heimavelli í deildinni.

Þessi jafntefli eru að verða liðinu dýr í toppbaráttunni og nú hefur Chelsea möguleika á að fara upp fyrir Liverpool á morgun.

"Við gerðum tvo alvarleg mistök og fengum á okkur tvö mörk upp úr þeim. Ég var ánægður með hvernig mínir menn svöruðu mótlætinu, en við verðum einfaldlega að vinna svona leiki ef við ætlum okkur að halda toppsætinu í deildinni," sagði Spánverjinn.

Það vakti gríðarlega athygli í dag að Benitez kaus að láta Robbie Keane sitja á bekknum allan tímann þó lið hans vantaði sárlega mark.

Í stað þess að setja Keane inn kaus hann að henda þeim Nabil El Zhar, Ryan Babel og Lucas Leiva inn af bekknum í síðari hálfleik.

Benitez varði ákvörðun sína í viðtali við Sky eftir leikinn.

"Ég var fyrst og fremst að hugsa um kantmennina í þessu sambandi. Það er ekki alltaf nóg að hrúga bara framherjum inn í teiginn í þessari stöðu," sagði Benitez.