Blendin viðbrögð við útrás ensku úrvalsdeildarinnar

Sitt sýnist hverjum um fyrirætlun stjórn ensku úrvalsdeildarinnar um mögulega útrás deildarinnar á næstu árum.

Í gær var sagt frá því að ef til þessa kæmi stæði til að bæta við einni aukaumferð við tímabilið sem yrði leikin á erlendri grundu í janúarmánuði hvert tímabil.

Aukaumferðin myndi vissulega hafa sitt gildi en líklegt yrði að dregið yrði með þeim hætti í umferðina að efstu fimm lið deildarinnar gætu ekki mæst innbyrðis.

Peningamönnunum í deildinni líst vitanlega afar vel á þessa áætlun enda er nokkuð víst að hún muni færa liðunum í deildinni góðar aukatekjur í vasann.

Þó eru þeir sem setja spurningamerki við þessa áætlun af ýmsum ástæðum. Margir telja að þetta sé ekki leggjandi á leikmenn sem þurfa nú þegar að sæta miklu leikjaálagi enda margar keppnir í gangi ár hvert fyrir utan sjálfa deildarkeppnina.

„Hvergi annars staðar í heiminum er meira að gera hjá knattspyrnumönnunum," sagði David Davies, fyrrum framkvæmdarstjóri enska knattspyrnusambandsins við BBC.

„Ég myndi miklu fremur vilja fá vetrarhlé á deildinni. Það er nauðsynlegt ef við viljum að liðin okkar verði sigursæl. Vandamálið er að við vinnum ekki alþjóðlegar keppnir félagsliða með reglulegu millibili."

Stuðningsmenn enskra félaga eru langflestir afar ósáttir við tillöguna en Davies segir að það komi sér ekki á óvart. Hins vegar verði þeir að hafa í huga að knattspyrnan hefur breyst.

„Svo sanngirni sé gætt verður að koma fram að það er ekki verið að leggja til að taka heimaleik af dagskránni og færa hann erlendis. Það er verið að ræða um að bæta einni umferð við dagskrána."

Harry Redknapp, stjóri Portsmouth, var heldur ekki sérstaklega hrifinn og sagði að með þessu yrðu ensku úrvalsdeildarfélagin lík körfuboltaliðinu fræga Harlem Globetrotters.

„Þetta byrjar allt á einni umferð og svo mun það sjálfsagt aukast með árunum þar til við spilum hluta tímabilsins á erlendri grundu."