Færeyingar fá 3G þjónustu frá Vodafone

3G farsímaþjónusta er nú í fyrsta sinn í boði í Færeyjum, eftir að Vodafone Færeyjar (dótturfélag Vodafone á Íslandi) hóf að bjóða slíka þjónustu í upphafi vikunnar. Hefur málið vakið talsverða athygli færeyskra fjölmiðla.

Í tilkynningu frá Vodafone segir að íslenskir og færeyskir tæknimenn fyrirtækjanna unnu saman að uppsetningu 3G kerfisins, sem einnig mun tengjast farsímakerfinu á Íslandi og auka þannig öryggi þeirrar þjónustu sem fyrirtækin veita, hvort í sínu landi.

Samtengingin mun tryggja, að hægt verður að veita farsímaþjónustu í Færeyjum gegnum símkerfi Vodafone á Íslandi, ef svo ólíklega vill til að þess gerist þörf. Að sama skapi mun kerfið í Færeyjum geta þjónustað viðskiptavini á Íslandi ef íslenska kerfið bregst, t.d. vegna náttúruhamfara.