Danir hagnast verulega á Sameinuðu þjóðunum

Í hvert sinn sem Danir láta eina krónu af hendi rakna til Sameinuðu þjóðanna fá þeir 15 krónur á móti frá þessari alþjóðlegu stofnun.

Blaðið Politiken skrifar um þetta á vefsíðu sinni í dag. Þar er því haldið fram að Danmörk sé það vestræna land sem hagnist mest á SÞ. Þetta helgast að því að þrjár stórar stofnanir SÞ. þar á meðal barnahjálpin UNICEF eru með skrifstofur í Kaupmannahöfn.

Það vinna sumsé um 1.000 manns á vegum SÞ í Kaupmannahöfn. Að vísu þarf SÞ ekki að hafa áhyggjur af húsaleigunni því danska utanríkisráðuneytið stendur straum af henni.

Samkvæmt Politiken keypti SÞ vörur og þjónustu fyrir um milljarð dkr. árið 2006. Það ár námu framlög Dana til SÞ um 70 milljónum dkr. Því er auðvelt að sjá að Danir fá fimmtánfalt það til baka sem þeir leggja til SÞ.