Dræm þátttaka í útboði ríkisbréfa

Tilboðum að upphæð 11,5 milljörðum króna að nafnverði var tekið í útboði á nýjum flokki ríkisbréfa sem fram fór í gærdag hjá Seðlabanka Íslands. Fyrirfram var búist við meiri þátttöku.

Þátttakan nú er heldur minni en í sambærilegu útboði sem fram fór í síðustu viku þar sem seldust ríflega 15 milljarðar. Útboðunum var meðal annars ætlað að mæta innlausn á öðrum ríkisbréfaflokknum, en greiðslu og uppgjörsdagur þeirra er á morgun. Ríkið þarf þá að greiða út nálægt 74 milljörðum króna.

„Jafndræm þátttaka hlýtur að vera ákveðið áhyggjuefni fyrir ríkisstjórnina og Seðlabankann," segir Jón Bjarki Bentsson, sérfræðingur Greiningar Glitnis.

„Einn megintilgangur þessa útboðs var að bjóða þeim sem eiga ríkisbréf á gjalddaga á föstudaginn kost á að framlengja í þeim stöðum." Hann segir jafnframt talið að meirihluti eigenda ríkisbréfaflokksins sem þá verði gerður upp sé útlendingar.

Þá bendir hann á að samanlögð kaup í nýafstöðnum ríkisbréfaútboðum ríkisins nemi aðeins 26 til 27 milljörðum króna, á móti um það bil hundrað milljörðum á gjalddaga á morgun.

„Mismuninn þarf ríkissjóður að greiða út," segir hann. Um leið sé ekki vitað hvað erlendir eigendur þessara peninga ætli að gera við þá, því utan vaxtagreiðslna séu þeir í raun fastir í landinu. „Þeir hljóta að fara á einhvers konar innistæður í bili og verður forvitnilegt að sjá hvað verður í framhaldinu."