Öfgafullt dæmi um tjón sem hlaust vegna greiðs aðgans að lánsfé

Ísland er öfgafullt dæmi um tjón sem hlaust að því hve auðvelt það var að fá lánsfé segir í grein um hrun bankakerfisins á Íslandi í Wall Street Journal í dag. Ísland, þessi fámenna þjóð, hafi verið einn af áköfustu leikendum í alþjóðlegu fjármálabólunni. Því hafi hrun bankakerfisins hér á landi haft áhrif um allan heim, allt frá Tókýó til Mið Austurlanda.

Í greininni er útskýrt á hvaða hátt Ísland tengdist hinum alþjóðlega fjármálaheimi og tekin dæmi af fyrirtækjum víða um heim sem hafa tapað á fjárfestingum á Íslandi. Til að mynda hafi þýskur banki tapað svo miklu á fjárfestingum sínum á Íslandi að hann hafi þurft að fá 30 milljarða evru aðstoð til að lifa af. Í fréttinni er einnig farið yfir aðdraganda hrunsins og sagt frá mótmælum sem hafa átt sér stað í miðborg Reykjavíkur.