Smápeningar í stöðumæla liðin tíð í borginni

Reykvískir ökumenn geta frá og með deginum í dag lagt þeim sið að aka um með öskubakka og aðrar hirslur bifreiða sinna fullar af smápeningum ætluðum stöðumælum. Fyrirtækið Stokkur Software ehf. hefur í samvinnu við Bílastæðasjóð Reykjavíkurborgar hleypt af stokkunum þjónustu sem gerir ökumönnum kleift með einfaldri tækni að greiða stöðugjöldin gegnum farsíma. Notendur þjónustunnar byrja á því að skrá sig til leiks hjá þjónustuveri Stokks og eru eftir það reiðubúnir til leiks. Greitt er visst mánaðargjald en þar fyrir utan greiðast eingöngu stöðugjöld samkvæmt gjaldskrá Bílastæðasjóðs. Ekki þarf að velja fyrir fram hve lengi stæði er notað þar sem eigandinn skráir bifreið sína út þegar hann kemur að henni á ný. Greitt er fyrir hverjar byrjaðar fimm mínútur. Sektir ættu því að verða fátíðari hjá þeim sem taka að greiða með símanum.

Hreinn Gústavsson hjá Stokki Software segir þjónustuna ekki glænýja, hún hafi farið í útboð árið 2004 en verið illa sinnt af þeim aðilum sem þá hafi tekið hana að sér svo þeir félagar hjá Stokki hafi gengið til samninga við Bílastæðasjóð. Hugbúnaðinn skrifuðu þeir sjálfir og Stokkur greiðir allan kostnað við þjónustuna. „Við greiðum fyrir allt, einu tekjur okkar af þessu eru mánaðargjöldin og við skilum því sem fólk greiðir upp á krónu til Bílastæðasjóðs," segir Hreinn. Hann útskýrir enn fremur að notandi þjónustunnar greiði sama stöðugjald og þurfi einungis að velja með símanum það svæði sem lagt er á. Þjónustan sé þó einungis í boði á þeim svæðum Reykjavíkur þar sem eru stöðumælar eða miðavélar, hún nái ekki til bílastæðahúsanna enn sem komið er.

Þeir félagar hjá Stokki eru tveir og bera þeir hitann og þungann af kynningu þjónustunnar, Hreinn var t.d. á leið niður í bæ að dreifa auglýsingamiðum um þjónustuna þegar blaðamaður náði tali af honum. Nánari upplýsingar um greiðslu stöðugjalds með farsíma má nálgast á heimasíðunni leggja.is.