Nær 200.000 dönsk börn í kauphallarviðskiptum

Nær 200.000 dönsk börn, undir 16 ára aldri, stunda kauphallarviðskipti. Og ef bætt er við unglingum upp að 19 ára aldri er fjöldinn 250.000. Að meðaltali fjárfestir hvert barn í þessum hópi fyrir 35.000 dkr. eða rúmlega 400.000 kr.

Samkvæmt frétt um málið í Jyllands Posten nema heildarfjárfestingar þessa hóps nær 9 milljörðum dkr. eða vel yfir 100 milljörðum kr. Það færist í vöxt meðal barna og unglinga undir tvítugu í Danmörku að stunda kauphallarviðskipti með sparnað sinn í stað þess að láta hann liggja inn á bankabók.

Og samkvæmt Jyllands Posten geta um 40.000 dönsk börn undir fimm ára aldri kallað sig fjárfesta. Er þá yfirleitt um að ræða að foreldrar viðkomandi leggja barnasparnaðinn í hlutabréf. Það mun einnig færast í vöxt að börnum séu gefin hlutabréf í afmælis- og jólafjafir.