Adebayor er leikmaður 25. umferðar

Í þriðja skipti á leiktíðinni hefur Emmanuel Adebayor hjá Arsenal verið valinn leikmaður umferðarinnar í ensku úrvalsdeildinni hér á Vísi.

Smelltu hér til að skoða myndband af leikmanni 25. umferðarinnar í ensku úrvalsdeildinni.

Adebayor skoraði tvö mörk og lagði upp það þriðja í 3-1 sigri Arsenal gegn Manchester City á útivelli. Um leið skaut hann Arsenal á topp deildarinnar á nýjan leik en um leið var þetta fyrsta tap City á heimavelli í deildinni í vetur.

Hvað markaskorun varðar eru hann og Cristiano Ronaldo hjá Manchester United í algjörum sérflokki. Ronaldo hefur skorað nítján mörk í deildinni og Adebayor átján, þar af átta í síðustu sex leikjum liðsins.

Hann hefur nú skorað í sex deildarleikjum í röð og er fyrsti leikmaður ensku úrvalsdeildarinnar sem nær því síðan að Ruud van Nistelrooy gerði það á sínum tíma.

Nýlega greindi Arsene Wenger, stjóri Arsenal, frá því að hann hafi verið nálægt því að klófesta Cristiano Ronaldo á sínum tíma, áður en hann gekk til liðs við Manchester United.

En í viðtali eftir leikinn um helgina sagði Wenger að hann myndi ekki vilja skipta á Adebayor og neinum öðrum leikmanni.

„Hann er besti alhliða sóknarmaðurinn í ensku úrvalsdeildinni," bætti Wenger við.

„Stærsta hrósið sem ég get gefið Adebayor er að hann hefur fyllt það skarð sem Thierry Henry skildi eftir sig. Og það er ekki auðvelt enda er Henry leikmaður í heimsklassa," sagði Wenger.

„Við höfum ekki gleymt Thierry og þeim afrekum sem hann vann fyrir Arsenal. En það er frábært hjá Adebayor að hafa náð að fylla þetta skarð."

„Adebayor er svipaður leikmaður og Didier Drogba og ég held að hann gæti orðið alveg jafn góður. Ég er hvað ánægðastur með hann af öllum þeim ungu leikmönnum sem við höfum fengið til félagsins í gegnum árin því hann er orðinn svo mikilvægur hluti af okkar liði."

Nafn: Emmanuel Adebayor

Fæddur: Lomé á Tógó, 26. febrúar 1984

Félög: Metz, AS Monaco og Arsenal.

Númer: 25

Lið 25. umferðarinnar í ensku úrvalsdeildinni:

Mark: Jussi Jaaskelainen, Bolton

Vörn:

Pascal Chimbonda, Tottenham

Jamie Carragher, Liverpool

Alan Hutton, Tottenham

Robert Huth, Middlesbrough

Miðja:

Kevin Nolan, Bolton

Jimmy Bullard, Fulham

Simon Davies, Fulham

Sókn:

Emmanuel Adebayor, Arsenal

Jermain Defoe, Portsmouth

Dimitar Berbatov, Tottenham

Smelltu hér til að sjá myndband af liði umferðarinnar.