Ótrúlegur sigur West Ham á Liverpool

Liverpool þarf að bíða eitthvað enn eftir fyrsta sigri sínum í deildinni á nýju ári en liðið tapaði fyrir West Ham í ensku úrvalsdeildinni í kvöld.

Allt útlit var fyrir markalaust jafntefli hjá liðunum en Jamie Carragher gerði sig sekan um afar slæm mistök er hann braut á Fredrik Ljungberg á lokasekúndum leiksins í eigin vítateig. Mark Noble skoraði sigurmark West Ham úr vítaspyrnunni og leikurinn var svo flautaður af.

Þrír leikir hófust klukkan 19.45 í kvöld en auk fyrrgreinds leiks gerðu Derby og Manchester City 1-1 jafntefli og Chelsea vann 1-0 sigur á Reading.

Úrslitin þýða að Liverpool er nú sautján stigum á eftir toppliði Arsenal en Chelsea heldur enn í við bæði Arsenal og Manchester United. Þessi þrjú lið eru langt komin með að stinga af á toppi deildarinnar.

West Ham - Liverpool 1-0

1-0 Mark Noble, víti (94.).

Dean Ashton hefur jafnað sig á bakmeiðslum sínum en byrjaði leikinn á varamannabekknum þar sem Luis Boa Morte og Carlton Cole voru í framlínunni.

Yossi Benayoun var í byrjunarliði Liverpool en hann er fyrrum leikmaður West Ham. Xabi Alonso byrjaði einnig inn á í fjarveru Javier Mascherano sem tók út leikbann í kvöld.

Dirk Kuyt og Fernando Torres voru í fremstu víglínu hjá Liverpool.

En það var Benayoun sem fékk fyrsta færi leiksins er skot hans fer naumlega yfir mark West Ham.

Boa Morte fékk einnig mjög gott færi bæði í upphafi fyrri og síðari hálfleiks. Í bæði skiptin hitti hann ekki markið af fremur stuttu færi.

Bæði lið fengu reyndar fullt af fínum færum en svo virtist sem að hvorugt ætlaði að færa eitthvert þeirra sér í nyt.

Það var ekki fyrr en að uppbótartíminn var að renna sitt skeið að Jamie Carragher braut skyndilega á Fredrik Ljungberg. Það voru aðeins nokkrar sekúndur eftir af leiknum og náði Mark Noble að standast pressuna og skora sigurmark West Ham í leiknum.

Þetta reyndist síðasta spyrna leiksins.

Chelsea - Reading 1-0

1-0 Michael Ballack (32.).

Brynjar Björn Gunnarsson var ekki í leikmannahópi Reading í kvöld vegna meiðsla en Ívar Ingimarsson var á sínum stað í vörn liðsins.

Paulo Ferreira lék í stöðu hægri bakvarðar hjá Chelsea á kostnað Juliano Belletti og Michael Ballack var komið í byrjunarlið Chelsea á ný eftir að hafa jafnað sig á smávægilegum meiðslum.

Hann tók stöðu Steve Sidwell sem mátti dúsa á bekknum gegn sínu gamla félagi.

Þær ákvarðanir áttu hins vegar eftir að reynast skynsamlegar þar sem Ballack kom Chelsea yfir með skallamarki eftir fyrirgjöf Ferreira í fyrri hálfleik.

Í seinni hálfleik fékk Nicolas Anelka gott færi til að tvöfalda forystuna en hann fékk upplagt skallafæri en skallaði beint á Marcus Hahnemann, markvörð Reading.

Það kom þó ekki að sök þar sem að Reading tókst ekki að jafna metin áður en leiktíminn rann út.

Derby - Manchester City 1-1

1-0 Sun Jihai, sjálfsmark (46.)

1-1 Daniel Sturridge (63.)

Paul Jewell hélt áfram að hringla í liði Derby enda lítið gengið og síðast tapaði liðið 4-1 fyrir Preston í bikarnum. Rob Earnshaw, Dean Leacock, Craig Fagan og Darren Moore fengu tækifærið nú.

Daniel Sturridge var í byrjunarliði Manchester City í fyrsta sinn en hann skoraði gott mark fyrir félagið í 2-1 tapleik liðsins fyrir Sheffield United í bikarnum um helgina.

Kelvin Etuhu, Sun Jihai og Stephen Ireland voru einnig í byrjunarliði City.

Gestirnir fengu fyrsta færið í leiknum strax á upphafsmínútunum er Darius Vassell á skot úr góðri stöðu rétt framhjá markinu eftir góðan undirbúning Claude Davis.

Vassell fékk svo 3-4 færi til viðbótar til að skora í fyrri hálfleik en allt kom fyrir ekki.

Derby náði svo að færa sér það í nyt er Kenny Miller átti skot að marki sem hafði viðkomu í Sun Jihai og hafnaði svo í markinu. Það skráðist sem sjálfsmark á þann síðarnefnda.

En unglingurin Daniel Sturridge bjargaði málunum fyrir sína menn með sínu öðru marki í jafn mörgum leikjum. Markið kom eftir fyrirgjöf Martin Petrov og var City-mönnum létt.

Þar við sat og urðu liðin að sætta sig við skiptan hlut í kvöld.