Landsliðshópur Englands kynntur á morgun

Fabio Capello mun kynna sinn fyrsta landsliðshóp á morgun og kemur þá í ljós hvort að David Beckham fær að spila 100. landsleik sinn á ferlinum.

Beckham segist vera í góðu formi og vonast til að verða valinn. „Ég er í jafn góðu formi og ég get verið í," sagði hann. „Ég er klár í landsliðshópinn."

Hópurinn sem Capello kynnir á morgun verður ekki endanlegi hópurinn sem mætir Sviss þann 6. febrúar næstkomandi en hann verður kynntur klukkan 19.00 á laugardagskvöldið.

Ákvörðun Capello um Beckham er ekki sú eina sem beðið er með eftirvæntingu heldur einnig hvern hann velur sem fyrirliða og einnig hvern hann velur sem aðalmarkvörð liðsins.