Michael Jordan heldur með Havant & Waterlooville

Einn af stjórnarmönnum utandeildarliðsins Havant & Waterlooville á Englandi er nú að leita að stærstu keppnistreyju sem hann finnur með liðinu til að senda körfuboltastjörnunni Michael Jordan.

Marcus Hackney, stjórnarformaður félagsins, segir einn af stjórnarmönnunum hafa verið í fríi á Bahamas-eyjum þegar smáliðið vann ævintýralegan sigur á Swansea í þriðju umferð enska bikarsins um daginn og tryggði sér stórleik við Liverpool í næstu umferð.

Við hlið hans sat enginn annar en körfuboltagoðsögnin Michael Jordan og sagði Hackney að Jordan hefði skemmt sér konunglega yfir leiknum og verið mjög spenntur.